Skip to content

Blog!

Hurrengo epealdiko postak ikusten: October, 2018

Kooperatibak batzarra egingo du azaroan

Igeldoko Kooperatibak batzarra egingo du azaroaren 11n (igandea). Goizeko 11:00etatik aurrera izango da, Itsas Aurren. Hori horrela, bazkide guztiei dei egiten diete bertaratzeko.
Landuko dituzten gaien artean, honakoak izango dira: obra aurrekontuak, bazkidetza motak, proiektuaren bideragarritasun ekonomikoa, izen korporatiboa eta logoa, crowfaundinga...

Pala Txapelketan apuntatzeko, azken egunak

Herri Kontseiluak eta Pelota Elkarteak elkarlanean, Neguko I. Pala Txapelketa antolatu dute eta izen ematea zabalik dago. Azken eguna azaroak 15 da. Ostiraletan izango dira partiduak azaroaren 30ean hasi eta martxoa bukaera arte (abenduak 7 eta 21 izan ezik). Arratsaldez jokatuko dira partiduak 18:00etan, 19:15etan eta 20:30etan.

Igeldon girotutako eleberria argitaratu dute: "Temporada de galernas"

Maria Pilar Lopez Vallejok Igeldon girotutako eleberria argitaratu berri du (irailak 28). “Temporada de galernas” du izena eleberriak. Asmatutako trama du, baina gerra aurreko garaian koka­tzen da eta Meteorologia Behatokian, zehazki. Idazlea, bertako langilea da eta istorio honekin ezagu­tzera eman nahi izan du euskal kostako klimaren berezitasunak, bertako fenomeno ohikoenak, eta batez ere, behatokiko historia, aurreko mendera salto eginez.
Eleberria, 316 orriko liburua da eta gazteleraz dago idatzia. Independently published da argitaratzailea. Amazonen dago erosgai.

Eguraldiak ez zuen giroa zapuztu

Beste behin ere, giro ederra jarri du herrian Udazken Festak, nahiz eta eguraldiak ez askorik lagundu. Pentsioen inguruko hitzaldiarekin ekin zitzaion ostiralean festari eta 20 bat lagun gerturatu ziren eskolara, Duintasuna elkarteko hiru kideren azalpenak entzutera. Herri Kontseiluaren laguntzarekin, 65 urtetik gorako herritar batzuk elkartzen hasi dira hilabeteko azken ostiraletan eta hitzaldi hau beraien ekimenez antolatu zen. Luntxa ere izan zuten Itsas Aurren. Eta orain, afari bat egin eta gaiaren inguruan mobilizatzen hastekoak dira. Afaria azaroaren 23an izango da eta 19:00etan jarri dute hitzordua.

Eskaera Udalean: "Boca de riego" eta hidranteak gertu dauzkaten baserri eta etxeek, giltzak eta mangerak eskura izatea

Herri Kontseiluak eskaera berri bat luzatu dio Donostiako Udalari, suteei aurre egiteko neurri gisara: "Boca de riego" eta hidranteak gertu dauzkaten baserri eta etxeek giltzak eta mangerak eskura izatea proposatu dio Herri Kontseiluak, «suteren bat piztuko balitz, bertako bizilagunek lanean hasteko aukera izan dezaten suhiltzaileak iritsi bitartean». Suteei aurre egiteko 2016ko planaren arabera (PAMIF), 47 boca de riego eta 37 hidrante daude Igeldon eta Herri Kontseiluak suteen aurrean arrisku gehien izan dezaketen zonaldeetarako eskatu ditu giltzak eta mangerak.
«Dakigunez, beste herri ba­tzuetan halako neurriak badituzte (Astigarragan, esaterako), eta Igeldorako ere egokia eta baliagarria izan daitekeela pentsatzen dugu», gaineratu du.
Herri Kontseiluak gaiaren inguruko idatzia aurkeztu du Udal erregistroan eta udaletxekoak harremanetan jarriak dira.

Azken postak

Artxibategia

2019
2018
2017

Kategoriak

Etiketak

Egileak

Web-jarioak

RSS / Atom