Urte hauetan zehar adierazitako beharrak agerian geratu dira berriz | Igeldo Herriko webgunea Skip to content

Urte hauetan zehar adierazitako beharrak agerian geratu dira berriz

(0 iruzkin)

Igeldoko Tokiko Entitate Txikia sor­tzeko bidean, igeldotarron partaide­tza prozesua jarri da abian. Bi asmorekin jarri da abian: alde batetik, igeldotarrak informatzea; eta bestetik, igeldotarren iritziak, kezkak eta beharrak jasotzea.
Lehenengo pauso bezala, mar­txoaren 20an bilera ireki bat egin zen Igeldon eta bertan 85 herritarrek hartu zuten parte. Igeldoko zerbi­tzuen eta lehentasunezko arloen inguruan aritu ziren hizketan. Jarrera aktiboarekin aritu ziren igeldotarrak.
Ondoren, galdetegi bat online betetzeko aukera ere izan da. 44 herritarrek erantzun dute galdetegia. Banakako elkarrizketak ere egiten ari da Siadeco enpresa.

Emaitzen laburpena
Siadeco enpresak bildu ditu emaitza guztiak eta laburpen bat helarazi dio Herri Kontseiluari. Bildutako datuen arabera, Igeldoko zerbitzuen artean hoberen baloratzen direnak honakoak dira: autobus-zerbitzuaren maiztasuna, Kaskoko zabor-bilketa, garbiketa eta zerbitzuak; Eskola eta Guraso Elkartearen lana; Ieltxo kultur elkartearen ikastaroak; Herri Kontseiluaren ekintzak; IKO Igeldoko Kooperatiba; Ostalaritza eskaintza.
Hobetu beharreko zerbitzuak edo aurrera begirako lehentasunak, berriz, honakoak dira nagusiki: herri-lanak; hirigintza planeamendua eta etxebizitza eskaintza; garraio publikoa; gizarte zerbitzuak eta osasungintza; kultur etxea eta kultur eskaintza; aisialdi edo kirol ekipamenduak; eskolaren espazioa bertatik kudeatzea; hondakinen birziklapena eta murrizketa, energia berriztagarriak; ingurune naturalaren zaintza; turismoa eta bertako ekonomia sustatzea.
Herri Kontseiluari jakinarazi diotenez, parte hartu duten herritar guztiei bidaliko diete emaitzen laburpena.

Baloratuenak, herritik sortutako ekintzak
Emaitzak aztertu ostean, Herri Kontseiluak argi ikusi duena da urte hauetan zehar igeldotarrek adierazitako beharrak plazaratu direla berriz: herri-lanen gabezia (mantenimendu eta konponketak edo egoera hobetzea), hirigintza eta etxebizitza, garraio publikoa hobetu beharra, gizarte zerbitzuak, azpiegitura eta espazio beharra…
Horrez gain, nabarmendu du hoberen baloratutako zerbitzu gehienek ez dutela udaletxearekin zerikusirik: «herritik sortutako ekin­tzak dira: Guraso Elkartearen jarduna, Ieltxoren ikastaroak, Herri Kontseiluaren ekintzak, IKO Igeldoko Kooperatiba, ostalaritza… eta oso adierazgarria da hori».

Gazteen beharrak falta
Bilera irekiko eta galdetegiko parte hartzaileen profilari begiratuta, azpimarratzekoa da gazteen ekarpen urria. 129 herritarrek hartu dute denera parte eta 30 urtetik beherakoak 7 izan dira (%5,43). Gehienak 30-65 urtekoak izan dira: 87 (%67,44). 65 urtetik gorakoak, berriz, 35 izan dira (%27,13).
Horiek horrela, Herri Kontseiluak ahalegin berezia egiteko asmoa du gazteak prozesura gerturatu eta beraien beharrak ezagutzeko. Lehenengo pausu moduan, bilera bat egin zuten maiatzaren 6an. Afari-merienda moduan izan zen kultur etxean, eta gazteen iritziak eta kezkak jasotzea izan zen helburua.

Lantalde osoko kideak, Igeldoko bileran
Igeldoko TET sortzeko lantalde bat dago lau hankakoa: Igeldoko ordezkariak, Donostiako Udaleko alderdi politiko guztietako ordezkariak, Udal Partaidetza saileko teknikariak eta Siadeco Ikerketa Elkarteko teknikariak daude. Lantaldea osatzen duten kide guztiak bilera irekian egon ziren Igeldon eta modu positiboan baloratzen du hori Herri Kontseiluak.

Justifikazio txostena prestatzen
Igeldotarren partaidetza prozesua aurrera doan bezala, Igeldoko TET eratzeko pausuek ere aurrera jarraitzen dute. Apirilaren 7an lantaldearen bigarren bilera izan zen Donostiako udaletxean. Bertan, Siadecok azaldu zuen Igeldoko TET sortzeko justifikazio txostena eta deszentralizazio-proiektuaren hasierako proposamena prestatzen ari direla. Maiatzerako izango da hori prest. Horretarako, udal departamentuekin aritu dira lanean eta Donostiako Udaleko eta Gipuzkoako hainbat udalerritako (500-1600 biztanle artekoak) aurrekontuak aztertu dituzte.
Lantaldearen hurrengo bilera ekainaren 22an izango da eta Siadecok prestatutako txostenaren inguruan ariko dira.

Oraindik ez du puntuaziorik jaso

Iruzkinak

Oraingoz ez dauka iruzkinik

Iruzkin berria

derrigorrezkoa

derrigorrezkoa (argitaratu gabea)

optional

derrigorrezkoa

captcha

derrigorrezkoa

Azken postak

Artxibategia

2024
2023
2022
2021
2020
2019
2018
2017

Kategoriak

Etiketak

Egileak

Web-jarioak

RSS / Atom